محسن: لو سمحت ، كنت عايز اشترى بيانو
العامل: اتفضل معايا...
محسن: ثانية بس ، انا عايز بيانو من غير صوابع سودا
العامل: نعم؟
محسن: معلهش ، شوفلى بس طلبى عشان مستعجل
العامل: مفيش حاجة اسمها كدة
محسن: يا سيدى مالاكش فيه ، انا عايزه كدة
العامل: ثانية واحدة
يذهب العامل الى المكتب فى الداخل ويخرج ومعه رجل كبير فى السن، مسيو فينسنت
فينسنت: ايوة خبيبى؟
محسن: عايز اشترى بيانو... بس من غير صوابع سودا
فينسنت: اه طبعا طبعا خبيبى، بس انت عارف ان ده عمره ما اتصنع
محسن: لأ طبعا اتصنع، انا شفت ناس بيستخدموه
فينسنت: طب معلهش خبيبى، ايه رأيك تاخد بيانو عادى وبلاش تلعب صوابعه السودا
محسن: لأ، اخاف العبهم بالغلط
فينسنت: هممممم، طب وانت هتلعب شارب وبيمول ازاى؟
محسن: احنا فى 2008
فينست: هو انت تعليمك فرنساوى.... ولا لاتينى؟
محسن: لاتينى طبعا...
فينست: واضح، واضح... بس قوللى خبيبى، انت ايه مشكلتك مع الصوابع السودا؟
محسن: انا باخاف العب الصوابع السودا، لحسن حياتى تبقى زيهم
فينسنت: انا معرفش انت ميولك فى الموسيقى ايه، بس انت عارف ان احلى الحاجات بتتستخدم الصوابع السودا؟
محسن: انا فاهم، بس دول اعداء النجاح... انا باحب الروتينية والملل بتاعة الصوابع البيضا... بتحسسنى بالأمان... أنا متأكد ان حياتى هتبقى هايلة ومنتجة لو انا فضلت العب ع الصوابع البيضا بس...
فينست: خياتك ايه خبيبى؟ انت شكلك من اللى بيتفرجوا وبس...
محسن: يعنى ايه؟
فينسنت: يعنى زى ما انت مش هيحصلك حاجة وحشة لو ملعبتش الصوابع السودا، فانت برضه مش هيحصلك حاجة كويسة... انت صعبان عليا خبيبى...
محسن: طب يعنى انا اعمل ايه دلوقتى؟
فينسنت: باردون خبيبى، انا محبش يكون ليا دخل فى اسلوبك ده... جوود داى.
No comments:
Post a Comment